Nagkatigom ang mga personahe sa nagkalain-laing ahensya sa gobyerno ug non-government agencies sa Agusan del Sur aron mapalig-on ang mga lakang sa pagpaabot og tabang sa mga kanhing rebelde o Friends Rescued (FR) nga nibalik na sa sabakan sa gobyerno.

Gipangunahan sa Office of the Presidential Adviser on Peace, Reconciliation, and Unity (OPAPRU) pinaagi ni Undersecretary Atty. Wilben Mayor ang duha ka adlaw nga Transformation Program Planning Workshop sugod Abril 3 didto sa ASELCO gym sa lungsod sa San Francisco, sa katuyuang mapakusgan ang pagpatuman sa mga programa sa Local Peace Engagements (LPE) para sa pagtubag sa insurhensya sa nasod og pagkab-ot sa malungtaron nga kalinaw.

Giimbitahan usab ang mga FRs nga maoy benepisyaryo sa mga paningkamot sa gobyerno aron masuta ang ilahang panginahanglan nga mamahinong tubag sa malungtaron nga kapanginabuhian kauban ang ilahang pamilya og komunidad. Katuyuan usab niini nga mamahimo sila nga produktibo nga sibilyan.

Giaghat ni Congressman Eddiebong Plaza ang mga ahensya sa gobyerno nga obserbahan ang Upland Sustainable and Agriforesty Development (USAD) program nga gisugdan niadtong 2013 sa lokal nga panggamhanan sa Agusan del Sur diin napamatud-an na kini nga nahimong instrumento sa pagpakunhod sa nasinating kalisod sa mga Agsurnon sa mga kabukiran nga bahin pinaagi sa paghatag og suporta sa mga mag-uuma sa ilahang pagtikad.

Tumong sa LPE nga mapalig-on ang kapasidad sa nasyonal ug lokal nga kagamhanan sa pagpatuman og lakang sa pagpalig-on sa kapasidad sa komunidad alang sa kalambuan ug kalinaw. | (: 𝐽𝑒𝑟𝑜𝑚𝑒 𝐿𝑎𝑏𝑖𝑠/𝑃𝑃𝐼𝑂-𝑃𝐴𝑀𝑅𝐸)