Gipahigayon sa mga personahe sa Department of Social Welfare and Development (DSWD) Caraga ang pagpanghatag og tabang pinansyal pinaagi sa Emergency Cash Transfer (ECT) program para sa mga lumolupyo sa lungsod sa Esperanza ug Talacogon nga naapektuhan sa baha tungod sa trough sa low-pressure area niadtong bulan sa Pebrero.

Gipangunahan ni Cong. Alfel Bascug sa District 1, Cong. Eddiebong Plaza sa District 2, Chief of Staff Patricia Anne “Ate Pat” Plaza, mga Sangguniang Panlalawigan members, mga mayor sa duha ka lungsod ug Sangguniang Bayan members, ang pag apud-apud sa cash aid sa mga indibidwal.

Midawat og tag ₱5,000 ang 3,118 ka indibidwal sa lungsod sa Esperanza gikan sa Barangay Cebulan, Labao, Nato, Langag, Piglawigan, Poblacion, ug Sta. Fe. Samtang, moabot sa 2,896 ka indibidwal ang nakadawat sa susamang kantidad sa Talacogon nga gikan sa Barangay Causwagan, La Flora, Maharlika, Labnig, San Isidro, San Nicolas, Gibong, San Agustin ug Zillovia.

Ang ECT inisyatibo sa DSWD nga nagtumong makatabang sa mga pamilya nga naapektuhan sa kalamidad para sa ilahang hinay-hinay nga pagbangon sa nasinating kalisod. | via Jireh Saludar (: 𝐽𝑒𝑟𝑜𝑚𝑒 𝐿𝑎𝑏𝑖𝑠/𝑃𝑃𝐼𝑂-𝑃𝐴𝑀𝑅𝐸)