Pormal nga gilusad sa Farmers Alternative Self-Reliance Multi-Purpose Cooperative (FASRMCO) ang Agri Mart diin nagkalain-laing mga abot sa uma ang mga display niini atol sa kasaulogan sa ika-20 nga Araw ng San Vicente, Properidad, Agusan del Sur kagahapon, Abril 22, 2024.

Ang maong inisyatibo gipangunahan sa FASRMCO nga gisuportahan sa mga opisyales sa barangay para mahatagan og pagtagad ang mga mag-uuma pinaagi sa paggahin og luna nga gitawag og Fresh Agricultural Supply, Retailing and Marketing Center Outlet diin mahimong i-display ang ilang mga abot sa uma.

Tungod niini, dili na malisdan ang mga mag-uuma sa pagdala sa ilang mga produkto ngadto sa layo nga mga merkado aron sa pagbaligya sa ilang mga abot ug dinhi barato usab ang ilang mga baligya tungod direkta kini nga gikan pa mismo sa uma ug wala na niagi sa mga ahente.

“Barato ra ang mga produkto dinhi tungod kay una, dili naman mogasto ang mga farmers aron ibyahe pa ang ilang abot. Ikaduha, wala nay patong sa presyo tungod ang mag-uuma mismo ang nagbaligya og wala na miagi pa sa mga negosyante,” butyag ni Barangay Captain Edna Porgatorio.

Dugang sa kapitana matag adlaw abli ngadto sa mga mag-uuma nga buot mo-display sa ilang produkto ang Agri Mart apan magpahigayon sila og tabo matag semana sa adlaw nga Sabado.

Gawas sa pagbukas sa Agri Mart, nagpahigayon ang San Vicente og Agri Booth contest nga gisalmotan sa matag purok ug nagkadaiyang grupo sa mag-uuma nga miyembro sa kooperatiba ug Backyard Gardening contest nga abli alang sa tanang mga molupyo sa barangay.

Mihimo usab sila og medical outreach alang sa mga katawhan diin adunay libreng check-up ug tambal ug mitunol og libreng serbisyo sama sa gupit, manicure ug pedicure. | (:𝐷𝘶𝑑𝘻 𝘕𝑜𝘵𝑎𝘳𝑖𝘰𝑛/PAMRE)