Nangandam na ang buhatan sa Education Development Services (EDS) sa provincial government of Agusan del Sur (PGAS) sa pagdawat og application documents para sa gusto nga mo-apply sa PGAS Scholarship Program alang sa school year 2024-2025.
Karong Mayo 2, 2024, magsugod na og dawat ang EDS sa mga aplikante para sa mga scholarship category nga full-blooded indigenous peoples, non-indigenous peoples, persons with disability (PWD), BS in Nursing, Doctor of Medicine, Bachelor of Laws, MS in Soil Science and Crop Protection, University of the Philippines Open University (UPOU), master’s degree ug doctoral degree.
Kalabot niini, padayon ang paglibot sa mga personahe sa maong buhatan sa 13 ka lungsod ug usa ka syudad ning lalawigan aron mapahibalo ang mga katawhan sa oportunidad para sa mga Agsurnon nga buot motungha sa kolehiyo.
Dunay duha ka pamaagi sa pag-apply sa scholarship program, ang pagpasa og requirements pinaagi sa email ug ang pag-submit sa ilahang kumpletong dokumento sa EDS nga nahimutang sa Libarnes Bldg., D.O. Plaza Government Center, Patin-ay, Prosperidad.
Para sa mga requirements ug dugang detalye, mamahimong i-follow ang Facebook page: PGAS-Education Development Services.
