Gitambungan sa mga women organizations sa Agusan del Sur ang gihimong Provincial Women’s Congress karon, Marso 26 didto sa Provincial Learning Center convention hall sa D.O. Plaza Government Center, Patin-ay, Prosperidad.
Gipangunahan sa Provincial Social Welfare and Development Office pinaagi ni PSWDO head Razel Montemor ang aktibidad nga naghatag og kalingawan sa mga kababayen-an. Sa maong panagtigom, gipahinumdoman sila sa ilahang kamahinungdanon sa komunidad nga adunay dakong kontribusyon alang sa kalambuan sa nasod.
Gihatagan usab og pasidungog sa Department of Trade and Industry Agusan del Sur office ang 3 ka mga negosyanteng kababayen-an nga nagmalampuson sa ilahang gisugdan nga negosyo.
Sa iyang kabahin, giawhag ni Governor Santi Cane Jr. nga ipadayon sa kababayen-an ang pag-exercise sa ilahang katungod isip babae.
“Congratulations sa inyohang tanan. Keep exercising your rights as women because men and women before the eyes of God and before our laws of the land, are equal,” pamahayag ni Gov. Cane.
Sa tema nga “Lipunang Patas sa Bagong Pilipinas; Kakayahan ng Kababaihan, Patutunayan”, nanawagan kini sa paghatag og patas nga oportunidad sa mga kababayen-an ug pagpakita ug paggamit sa hingpit nila nga potensyal nga adunay dakong ambag alang sa kalamboan sa nasod. |
:𝐶𝑙𝑒𝑚𝑧 𝐴𝑟𝑜𝑦 (𝑃𝑃𝐼𝑂/𝑃𝐴𝑀𝑅𝐸)
