Gipangunahan ni Agusan del Sur Governor Santi Cane Jr. ang pagtunol niadtong Sabado, Abril 20 og mga sapatos nga gamiton sa mga atletang Agsurnon nga modula sa mga nagkalainlaing event sa umaabot nga Caraga Regional Athletic Games 2024 sunod bulan.

Inisyatibo kini sa Team Eddiebong diin kauban sa personal nga mitunol sa parisan sa mga sapatos nga haom ang disenyo alang sa ilang mga tagsa-tagsang dula nga apilan ang mga Sangguniang Panlalawigan members sa pagpanguna ni Vice Governor Sammy Tortor.

Midonar usab og dugang sapatos para sa basketball si San Francisco Sangguniang Bayan member Jing Pulvera nga personal nga mitunol niini sa mga atleta. Moabot sa 135 ka pares sa sapatos ang nahatag sa mga magdudula sa elementarya samtang 165 ka pares alang sa sekondarya.

Nasayrang suportahan pud sa Team Eddiebong ang mga swimmer athletes para sa ilahang swimsuit nga gamiton sa kompetisyon sa Mayo 5-11 ning tuig nga ipahigayon sa Agusan del Sur isip host province. | (:𝑁𝑜𝑦 𝐺𝑟𝑎𝑑𝑜/𝑃𝐴𝑀𝑅𝐸)