Mapasalamaton si Bureau of Fire Protection (BFP) Caraga Regional Director C/Supt. Fred Trajeras Jr. sa Agusan del Sur sa pagpanguna ni Gov. Santi Barriga Cane Jr. sa pagtugot kanila nga magtukod og kaugalingong Provincial Fire Marshal office sa 600 sqm. nga luna sulod sa D.O. Plaza Government Center sa Patin-ay, Prosperidad.

Ang pamahayag giluwatan ni C/Supt. Trajeras atol sa gipahigayong ceremonial signing sa usufruct agreement tali sa panggamhanang probinsyal ug sa BFP Caraga office, kagahapon, Lunes, Marso 11, sa conference room sa buhatan ni Gov. Cane.

Sumala ni Provincial Fire Marshal Rowella Cullantes, usa sa rason nga wala pa makabaton og kaugalingong firetruck ug ambulansya ang BFP Agusan del Sur tungod wala silay igong espasyo nga kabutangan niini nga magamit unta sa paspas nga pagresponde panahon sa emerhensiya. Gilaumang mamahimong mas epektibo ang serbisyo nga mahatag sa BFP sa katawhan sa probinsya tungod sa tukuron nga opisina diin gikatakdang masugdan na kini sa mosunod nga tuig.