Gipahigayon sa mga personahe sa Department of Social Welfare and Development (DSWD) Caraga ang pagpanghatag og tabang pinaagi sa Emergency Cash Transfer (ECT) program para sa mga lumolupyo sa Agusan del Sur nga naapektuhan sa baha tungod sa trough sa low-pressure area niadtong bulan sa Pebrero.

Niining adlawa, Abril 2, gipahigayon ang pagtunol og ayuda sa lungsod sa San Francisco ug Rosario. Gipangunahan ni Gov. Santi Cane Jr., Cong. Eddiebong Plaza sa District 2, Chief of Staff Patricia Anne “Ate Pat” Plaza, mga Sangguniang Panlalawigan members, mayor sa duha ka lungsod ug mga Sangguniang Bayan members ang pag apud-apud sa cash aid.

Midawat og tag ₱5,000 ang 542 ka indibidwal sa lungsod sa San Francisco gikan sa Barangay Buenasuerte, Caimpugan, Ladgadan, Pasta, Santa Ana ug Tagapua. Samtang, moabot sa 1,296 ka indibidwal ang nakadawat sa susamang kantidad sa Rosario nga gikan sa Barangay Cabantao, Wasian, Novele, Tagbayagan, Bayugan 3, Sta. Cruz ug Maligaya.

Ang ECT inisyatibo sa DSWD nga nagtumong makatabang sa mga pamilya nga naapektuhan sa kalamidad para sa ilahang hinay-hinay nga pagbangon sa nasinating kalisod. | (: 𝐶𝑙𝑒𝑚𝑧 𝐴𝑟𝑜𝑦/𝑃𝐴𝑀𝑅𝐸)