Mibisita sa Provincial Public Information Office (PPIO) ang mga student journalist sa Philippine Normal University – Mindanao nga anaa sa Prosperidad, Agusan del Sur niining adlawa, Abril 24, aron makita ang daily operations sa maong buhatan para ilahang kakuhaan og giya sa pagpalambo sa pagpadagan sa ilahang broadcasting ug digital unit.
Gitan-aw sa 20 ka student journalists kauban ang ilahang broadcasting head ug adviser sa “The Torch Mindanao” nga si Prof. Honey Jaysa Antigua, ang operasyon sa PTV-Agusan del Sur ug DXGP Radyo Agusan.
“We believe that we are still in need of upskilling so that we could capacitate our news anchors, our presenters, our video editors, and the staff to produce better content and to have a wider reach among our students and stakeholders,” matud ni Antigua.
Gitan-aw usab nila ang operasyon sa Public Affairs and Media Relations (PAMRE) division sa maong buhatan sa provincial government sa Agusan del Sur nga maoy gadumala sa news publications ug social media platforms.
Gikalipay sa mga student journalist ang gihanyag nga partnership sa PPIO sa pagpanguna ni Provincial Public Information Officer PJ Dela Peña diin abli ang buhatan sa paggiya kanila aron mapalambo ang ilahang kapasidad sa news reporting ug broadcasting.
