Suportado ni Agusan del Sur Gov. Santi Barriga Cane Jr. ang mga lakang sa Department of Environment and Natural Resources Protected Area Management Office (DENR-PAMO) sa mga paninguha niini nga maapil sa World Heritage list sa United Nations Educational, Scientific and Cultural Organization (UNESCO) ang Agusan Marsh Wildlife Sanctuary (AMWS) isip natural heritage site.

Nakigpulong ang mga personahe sa DENR-PAMO sa pagpanguna ni Protection Area Superintendent (PASu) designate Sherrilyn Vasquez kang Gov. Cane kauban sila Provincial Tourism Officer Dannah Rufalyn Buquir, Provincial Planning and Development Coordinator Dr. Trishah Fe Goloran, ug Provincial Environment and Natural Resources Officer Rex Mel Acedillo niadtong Abril 19, sa tinguha nga makuha ang ilahang suporta arun hugot nga mapangandaman ang preliminary assessment o ang ikaduha sa upat ka proseso sa World Heritage Nomination.

Usa ang AMWS sa mga sites sa Pilipinas nga na-published sa UNESCO website tentative list niadtong Marso 11, 2024.

“Sa karon naa nata sa UNESCO World Heritage Site Tentative List ug ang second part ani, ang preliminary assessment sa area. Dako kaayo og tabang si Gov (Cane) para maka-identify nami kung asa sa protected area ang atuang ipa-declare,” pamahayag ni Vasquez.

Arun masiguro ang kalampusan nga mahilakip sa UNESCO World Heritage list ang Agusan Marsh Wildlife Sanctuary, magtambayayong ang PENRO, PPDO, PTourism ug uban pa nga ahensya sa gobyerno sa mugnaon nga team nga mututok sa pagpangandam sa preliminary assessment.

Gawas sa mga benipisyo nga maangkon sama sa international recognition kung maapil sa UNESCO World Heritage List ang AMWS, mapatas-an usab ang kahibalo sa kadaghanan sa kamahinungdanon niini sa pagpakunhod sa epekto sa climate change rason nga angay lamang kini nga protektahan ug panalipdan sa unsa mang kadaut para sa umaabot pa nga henerasyon. Samtang, gituohan usab nga mapakusgan ang turismo sa probinsya nga makatabang sa ekonomikanhong aspeto sa Caraga Region. | (: 𝐽𝑒𝑟𝑜𝑚𝑒 𝐿𝑎𝑏𝑖𝑠/PAMRE)