Gitunol sa panggamhanang probinsyal sa Agusan del Sur ang mga medisina ug medical supplies sa Valentina Galido Plaza Memorial Hospital (VGPMH) sa lungsod sa Bunawan, karong adlawa, Abril 5, sa pagpanguna nila Gov. Santi Cane Jr., Cong. Eddiebong Plaza sa District 2, Cong. Alfel Bascug sa District 1, Vice Gov. Sammy Tortor, mga Sangguniang Panlalawigan members, ug ni Chief of Staff Patricia Anne “Ate Pat” Plaza.

Mapasalamaton si Gov. Cane sa paningkamot ni Cong. Eddiebong nga makakuha og mga supply pinaagi sa donasyon sa United Laboratories kon Unilab, usa ka pribadong kumpanya, diin dako kini nga ikatabang para sa mga pasyente ilabi pa nga adunay kakulangon ang ospital sa tambal.

Sa pag-aghat ni Cong. Eddiebong, gipaniguro ni Chief of Hospital Dr. Maria Virginia Abacajen nga i-prayoridad sa libreng tambal ang mga indigent patients.

Mapasalamaton usab si VGPMH Administrative Officer Claryn Elorde sa tanang suporta nga gihatag sa kongresista sama na lamang sa on-going construction sa two-storey diagnostic building nga mokabat og ₱50 million ug ang ₱18M emergency room building nga nakatakdang i-turnover sa Department of Public Works and Highways (DPWH) sa susamang adlaw.

“This is from the congressional fund downloaded to DPWH. On behalf of VGPMH, we are so grateful kang Cong. (Eddiebong) nga grabi og paningkamot para sa mga Agsurnon nga makadawat og dekalidad nga serbisyong panglawas,” pamahayag ni Elorde. | (: 𝐽𝑒𝑟𝑜𝑚𝑒 𝐿𝑎𝑏𝑖𝑠 /𝑃𝐴𝑀𝑅𝐸)