Gitambongan sa gatusan ka mga indibidwal gikan sa nagkadaiyang sektor sa katilingban ang Buhay Ingatan, Droga’y Ayawan (BIDA) Program rollout sa Agusan del Sur sa pagpanguna sa Department of the Interior and Local Government (DILG) provincial office, niining adlawa, Biyernes, Marso 22, 2024, didto sa Datu Lipus Makapandong Cultural Center, Patin-ay, Prosperidad.

Gipamahayag ni Gov. Santi Barriga Cane Jr. atol sa maong tigom nga angay mapadayon ang BIDA program sa DILG katambayayong ang nagkalain-laing sektor pinaagi sa hugot nga implementasyon sa programa sa nagkadaiyang lakang sa kampanya batok ilegal nga droga arun nga masiguro nga ma protektahan ang katawhan sa kadaut nga dulot sa paggamit sa ginadiling droga.

Kalabot niini, nakig alayon si Gov. Cane sa regional ug provincial office sa Philippine Drug Enforcement Agency (PDEA) arun masiguro nga walay bisan usa nga empleyado sa lokal nga panggamhanan sa Agusan del Sur ingon man mga empleyado sa national agencies nga nag-opisina sulod sa government center ang mugamit og ilegal nga droga pinaagi sa paghimo og random drug testing sa tanang empleyado.

“It is but the responsibility of the government to ensure the safety of its constituents, of its people, from the dangers of illegal drugs. Busa, mipagawas ako og usa ka executive order para dinhi sa government center. It is an order declaring a safe, drug free work place and that would include offices of the national line agencies of government nga ania sulod sa government center,” pamahayag ni Gov. Cane.

Atol sa BIDA Program rollout sa Agusan del Sur, gitaho sa DILG pinaagi sa mga nagkadaiyang sektor ang ilahang accomplishments sa pagdumala sa pakigbatok sa ilegal nga droga. Dungan sab nga gipahigayon ang culmination sa selebrasyon sa Women’s Month 2024 diin gipartisiparan sa mga indibidwal ang Zumba dance ug fun run. | (: 𝐶𝑙𝑒𝑚𝑧 𝐴𝑟𝑜𝑦, 𝐽𝑒𝑟𝑜𝑚𝑒 𝐿𝑎𝑏𝑖𝑠/𝑃𝑃𝐼𝑂-𝑃𝐴𝑀𝑅𝐸)