Gitaho sa Philippine Statistics Authority (PSA) Agusan del Sur pinaagi ni Demetrio Dejolde Jr., ang OIC-Supervising Statistical Specialist nga mikunhod ang kaso sa kapobrehon sa probinsya sa Agusan del Sur gikan 39.6% sa 2021 ngadto sa 25.8% sa 2023. Natala ang 70,070 ka pamilya nga AgSurnon nga nakasinati og kapobrehon sa 1st semester sa 2021 samtang 47,810 ang natala sa 1st semester sa 2023.

Alayon niini, gipakusgan pa ni Gov. Santi Cane Jr. ang ilahang mga paningkamot kauban ang mga hepe sa mga buhatan sa lalawigan, mga mayores ug ni Cong. Alfel Bascug sa Distrito 1 ug Cong. Eddiebong Plaza sa Distrito 2 sa pagpakunhod sa poverty incidence rate sa probinsya. Gitutukan sa probinsyal nga panggamhanan ang natad sa agrikultura nga maoy gituohang dako ang matabang sa pagsulbad sa nasinating kalisod sa mga lumolupyo sa probinsiya.

Nag-una na niini ang hugot nga implementasyon sa Upland Sustainable and Agriforestry Development kon USAD nga maoy flagship program sa probinsya nga naghatag ug nagkalainlaing tabang sa mga mag-uuma ug dili pa lang dugay, ang padayon nga konstruksyon sa state-of-the-art soils laboratory nga nahimutang sa D.O. Plaza Government Center. Kini mapahimuslan sa mga mag-uuma sa Agusan del Sur alang sa soil analysis aron masuta kung unsay angayang itanom sa ilang umahan ug ang abuno nga gamiton sa ilahang pagtikad para mapatas-an ang abot ug kita sa mga mag-uuma.