Sa pinakaunang live remote broadcast sa DXGP 89.7 FM didto sa lungsod sa Sibagat niadtong Hunyo 6, gipadayag ni Vice Mayor Maria Liza Evangelista ang mga programa sa lokal nga panggamhanan.

Sa natad sa agrikultura, padayon nga ginasuportahan sa LGU-Sibagat ang mga mag-uuma pinaagi nagkadaiyang proyekto ubos sa Organic Agriculture Program sa lungsod alang sa malungtaron nga pagpanguma.

Usa usab sa gina-promote sa Sibagat ang abaca industry diin padayon nga ginasuportahan sa LGU ang mga abaca weavers pinaagi sa paghatag og handlooms ug dugang weaving centers sa Barangay Kauswagan ug Barangay Sinai, katambayayong ang ubang ahensya sa gobyerno.

Ang gideklarang ecotourism site nga “Pinandagatan Waterfalls” sa Barangay New Tubigon ang usa sa gilaraw nga mapalambo sa lungsod.

Gani, mibobo og pondo ang national government pinaagi sa Tourism Road Infrastructure Project Prioritization Criteria sa Department of Tourism sa kantidad nga P121M alang sa pagkonkreto sa New Tubigon bridge ug laing P197M para sa pagkonkreto sa dalan paingon sa maong tourism site.

“Dako kaayo ang pagpapasalamat sa lungsod tungod sa suporta sa national government. Kini nga pag-abli sa lungsod sa sustainable tourism development is really part of the agenda also of the national government,” matud ni Vice Mayor Evangelista.

“Akong giawhag ang mga Sibagatnon to really be with us in this agenda for sustainability. We are all in this together for a better municipality, for a better province of Agusan del Sur, and that’s our contribution for a better Philippines,” dugang sa bise mayor.

Nahimong oportunidad usab para sa mga mag-uuma sa lokalidad ang maong patigayon pinaagi sa pag-display sa ilahang nagkadaiyang produkto ug mga organikong gulay nga gidugok sa mga mamalitay didto sa Municipal Agriculture Office sa lungsod.