Gipilahan sa mga Agsurnon nga nagpangidaron og 18-24 anyos ang katapusang adlaw sa pagpangdawat og mga aplikante alang sa JobStart Program 2024 ning Hunyo 5, didto sa Public Employment Services Office (PESO) sa panggamhanang lokal sa Agusan del Sur katambayayong ang Department of Labor and Employment (DOLE).

Tumong sa JobStart Program nga makahatag og life skills, technical training, ug internships sa mga partner private employers, arun matudluan ug maandam ang mga benepisyaryo sa pagpangempleyo.

Sumala ni JobStart Program focal person Indah Mariz Retuerto sa PESO, adunay 120 ka slots ang programa diin ang 100 niini, gigahinan og pondo sa probinsyal nga panggamhanan samtang ang 20 ka slot, gisuportahan sa DOLE para sa ilahang daily allowance nga 400 sulod sa unom ka bulan nga training.

“Ang atuang dawaton sa JobStart Program kadtong wala nag-eskwela ug walay trabaho. Ang tumong gyud natu ani nga mahatud ang mga benepisyaryo sa pag-panarbaho kay kini sila galisud gyud sa pagpangita og trabaho. Pinaagi niini nga programa, matabangan natu sila nga maka-angkon og kasinatian sa pagpanarbaho,“ dugang ni Retuerto.

Usa si Kenneth Palmares nga taga Brgy. Sto. Tomas, Loreto ang ni-apply sa JobStart Program. Mag-usa ka tuig na matud pa siya nga naka-tambay sukad migradwar sa kolehiyo sa kursong Bachelor of Elementary Education niadtong 2023.

Ang makuha nga daily allowance, gamiton matud pa niya sa galastuhon sa iyahang pag-review kada weekend kabahin sa iyahang pagpangandam para sa Licensure Examination for Teachers.

“Dako kaayo ning tabang labi na nga adunay trainings ug makakat-on kami sa dagan sa pagpangempleyo. Dako napod kaayo ni nga tabang para sa mga nagpangita og trabaho,” pamahayag ni Kenneth Palmares.

Ang mapili sa JobStart Program 2024, magsugod sa ilahang training sa June 10 ning tuig.