Nahimong emosyonal ug mitulo ang luha sa 23 ka mga Persons Deprived of Liberty (PDL) human sila migradwar pag-eskwela pinaagi sa Alternative Learning System (ALS) niadtong Mayo 28, 2024 sulod mismo sa provincial jail sa Agusan del Sur nga gidumala sa Provincial Correctional and Security Management Office (PCSMO) ug Department of Education (DepEd).
Migradwar sa elementarya ang 13 ka mga PDL samtang 10 usab ang nakahuman sa junior high school ug midawat og diploma, medalya ug certificate of rating.
Aduna usab silay gidawat nga mga espesyal nga pasidungog sama sa Mahagsay award, Leadership Award ug Conduct Award.
Usa na niini si alyas Chard, 39 anyos nga nakahuman sa HS isip Mahagsay awardee.
“Dako gyud ang akong kalipay nga bisan nia mi sa sulod, gihatagan gihapon mi og tsansa nga makab-ot namo ang among naputol sa una nga pangandoy,” butyag ni Chard.
“Sa una, gusto nako makatapos sa kursong Hotel and Restaurant Management apan tungod sa nahitabo sa ako, naundang ang akong pagtungha. Sa karon pasalamat ko tungod sa ALS, nakatiwas ko og HS,” dugang pa niini.
Ang ALS usa ka programa sa DepEd nga naghatag og paglaom sa mga edaran nga makatapos sa ilang pag-eskwela. Kini usa ka parallel nga sistema sa pagkat-on nga naghatag ug praktikal nga kapilian sa kasamtangan nga pormal nga pagtudlo kung wala o dili maka-access sa pormal nga edukasyon sa mga tulonghaan.
Tungod sa pakig-alayon sa PCSMO ug DepEd, gidala sulod sa provincial jail ang ALS aron nga matagamtam kini sa mga interesadong PDL. (Ronald S. Notarion / PAMRE-PPIO-ADS)
