Moabot sa 67 ka tourism workers gikan sa lungsod sa Prosperidad, Rosario, Loreto, ug Esperanza ang nakadawat og tag ₱5,000 nga ayudang pinansyal gikan sa Emergency Cash Transfer program sa Department of Social Welfare and Development (DSWD) katambayayong ang Department of Tourism (DOT) ubos sa “Bayanihan sa Bukas na May Pag-asa sa Turismo” o BBMT program.
Gipangunahan ni Agusan del Sur Gov. Santi Cane Jr., DOT Caraga Director Ivonnie Dumadag, personahe sa DSWD Caraga, ug ni Provincial Tourism Officer Dannah Rufalyn Buquir ang paghatag og ayuda sa mga benepisyaryo didto sa Provincial Learning Center sa Patin-ay, Prosperidad, niining adlawa, Mayo 27. Gitunol usab ngadto sa mga benepisyaryo ang livelihood start-up kits nga makatabang sa paghatag og alternatibong panginabuhian human sa ilahang pagpailawom sa nagkadaiyang livelihood trainings. Usa ang sektor sa turismo sa Agusan del Sur sa apektado sa shear line ug low pressure area nga nagdulot og labihang pagbaha sa pipila ka lugar sa probinsya niadtong Pebrero ning tuig ug tungod sa pagsarado sa mga tourism sites, naapektuhan ang panginabuhian sa mga tourism workers. Ang Bega Falls sa Barangay Mabuhay, Prosperidad nga usa sa ginadayo nga tourism spot sa probinsya, temporaryo nga nagsarado tungod sa nasinating kalamidad. “Kadto nga time wala gyud mi operation ug ang atoang tourism, naapektuhan ato nga panahon. On behalf sa tourism staff sa Mabuhay Bega Falls, dako ang amoang pagpasalamat, dako ni nga tabang. Nagpasalamat mi sa DOT ug sa DSWD ug sa trainings para sa livelihood program,” pamahayag ni Luisito Sabado, Bega Falls Local Tourism Supervisor. Dungan nga gipahigayon ang seremonya para sa mga benepisyaryong tourism workers sa Davao Region didto sa Mati City, Davao Oriental nga gitambongan usab ni DSWD Secretary Rex Gatchalian ug DOT Secretary Christina Frasco. Sa mensahe ni Gov. Cane via online, nagpasalamat kini sa joint program sa DSWD ug DOT. “Nagpapasalamat po ang provincial government of Agusan del Sur for having included us sa programang ito na ibibigay natin ngayon,”pamahayag sa gobernador.
