Personal nga gitunol ni Gov. Santi Cane Jr. ang mga tseke para sa mga nagkalain-laing proyekto sa walo ka barangay sa probinsya karong adlawa, Mayo 27, didto sa buhatan niini sa kapitolyo sa Patin-ay, Prosperidad.

Pag-konkreto sa barangay streets sa San Nicolas, Talacogon nga nagkantidad og ₱5M ang gamitan sa ayudang nadawat gikan sa General Fund (GF) sa probinsyal nga panggamhanan sa Agusan del Sur. Sugdan matud pa ang concreting sa dalan gikan sa Purok 1 hangtud 4 sa maong barangay sugod sa Hulyo ning tuig.

Mapasalamaton si Punong Barangay Mitch Quijada sa gihatag nga kantidad nga tubag matud pa sa dugay na nga gipangandoy sa katawhan sa maong lugar.

“Dako kaayo namo nga kalipay labi na ang council tungod kay gitagaan mi ni Gov. Cane sa maong kantidad para sa amoang project,” pamahayag ni Quijada.

Ang laing pito ka barangay nga nakadawat og tseke mao ang Langkilaan sa Trento, Catmonon sa Esperanza, Magsaysay ug Poblacion sa Veruela, Lydia sa La Paz, Policarpo sa San Luis ug Patin-ay sa Prosperidad.

Ang kantidad nga sobra sa ₱11M, gikan sa GF ug Provincial Development Fund sa 2023 sa probinsya.