Gipangunahan ni Gov. Santi Barriga Cane Jr. ang pagpanumpa sa mga bag-ong opisyales sa Agusan del Sur Volleyball Federation (ADSVF) didto sa iyahang buhatan sa Provincial Capitol, karong adlawa, Mayo 15, 2024.
Dungan niini, giaghat ni Gov. Cane ang grupo nga mohimo og mga programa nga makapapukaw sa interes sa mga kabataan sa dulang volleyball. Gidasig usab sa gobernador ang grupo nga momugna og volleyball team sa Agusan del Sur diin andam ang panggamhanang probinsyal nga mosuporta sa ADSVF gikan sa recruitment ug training, aron magmalahutayon ang mga atletang Agsurnon.
“Since naa naman tay sports complex, help the province towards that direction. Give more focus on the young ones, focus on elementary, out-of-school youths,” aghat ni Gov. Cane.
Gikalipay usab sa grupo nga pinangulohan sa ilang presidente nga si Mr. Marlo Orcullo ang pagpamahayag og hugot nga suporta sa gobernador para sa ilahang iduso nga mga proposals.
Usa sa ilahang plano mao ang pagplastar sa organisasyon sa mga players, coaches, ug referees sa matag munisipyo. “Rest assured nga kami sa ADSVF, maka-create gyud mi og competitive team from the volleyball community kay sugod karon, ma-intensify na gyud ang willingness sa grassroots level,” pamahayag ni Orcullo.
