Personal nga gitunol ni Gov. Santi Barriga Cane Jr. ang mga tseke para magamit sa mga nagkalaing-laing proyekto sa pito ka barangay sa probinsya karong adlawa, Mayo 14, didto sa buhatan niini sa kapitolyo sa Patin-ay, Prosperidad.

Konstruksyon sa slope protection sa barangay hall ang gamitan sa nadawat nga kantidad sa Barangay Katipunan, Veruela. Sumala ni Kapitan Telma Teresita Castolo, makatabang ang proyekto nga maproteksyunan ang pasilidad sa posibleng kadaut dulot sa kalamidad.

“Dako nako nga pagpasalamat nga na-grant ang kantidad nga amoang gipangayo gikan sa probinsya sa Agusan del Sur kay dakong tabang kini para sa barangay namo,” matud pa ni Castolo.

Konstruksyon usab sa Community Center phase II ang gamitan sa nadawat nga kantidad sa Barangay Guibonon, Esperanza.

Mapasalamaton si Kapitan Emma Casugudan kang Gov. Cane tungod sa dakong tabang niini sa ilahang komunidad.

Ang laing lima ka barangay nga nakadawat og tseke mao ang Nuevo Trabajo ug Mahapag sa San Luis, Sawagan ug Sta. Cruz sa Veruela ug Napo sa Prosperidad.

Ang kantidad nga sobra sa ₱3M gikan sa General Fund (GF) ug Provincial Development Fund (PDF) sa 2023 sa probinsya.