Gipangunahan sa Provincial Health Office (PHO) sa probinsyal nga panggamhanan sa Agusan del Sur ang misting operation sa mga billeting quarters sa mga delegado nga mosalmot sa umaabot nga Caraga Regional Athletic Games 2024.
Kabahin kini sa pagpangandam sa probinsya isip host sa CRAG 2024 karong Mayo 5 – 11, aron masiguro nga luwas ang mga atleta sa vector-borne diseases o mga sakit nga dala sa lamok ug uban pang insekto sama sa dengue, filaria, ug malaria.
Una na nga nagpahigayon og misting ang PHO sa mga billeting quarters sa East Prosperidad Central Elementary School, Prosperidad National High School, Patin-ay Central Elementary School ug Agusan del Sur National Science High School.
Magapadayon ang misting operation sa PHO hangtud Abril 26, sa mga nahibiling identified billeting quarters sa lungsod sa Prosperidad, San Francisco ug Bayugan City.