Gipahigayon ang ceremonial turn-over sa livestock, poultry breeder stocks, ug incubator sa mga enrollees sa Poverty Alleviation Program – Livestock Development Program (PAP-LDP) sa panggamhanang probinsyal sa Agusan del Sur sa pagpanguna ni Gov. Santi Cane Jr., Provincial Veterinarian Dr. Joriz Elevazo ug Dr. Konielou Berdin sa Provincial Veterinary Office, kagahapon, Martes, Marso 12.

Gitunol sa PVO ngadto sa mga benepisyaryo ang 116 ka baboy ubos sa Swine Development Project, 16 ka kanding sa Goat Development Project, 21 ka baka sa Cattle Development Project, 400 ka manok sa Poultry Development Project ug 22 ka incubator cum hatcher.

Kini nga programa, stratehiya sa lokal nga panggamhanan aron matabangan mahaw-as sa kapobrehon ang mga AgSurnon. Milaum si Gov. Santi Barriga Cane Jr. nga amomahon ug palambuon sa mga benepisyaryo ang nadawat nga suporta aron labi pa nila kining mapahismulan sa pagpauswag sa ilang mga kinabuhi.